అమావాస్య సుందరి

2023-01-08 11:31:17.0

https://www.teluguglobal.com/h-upload/2023/01/08/434369-amavasya-sundari.webp

ఆమె చీకట్లో

శరీరాల్ని వ్రేలాడ దీస్తుంది

వేళ్ళతో ను కాళ్ళతోనూ

కుళ్ళబొ డుస్తుంది

బస్కీలు తీస్తుంది

నిన్ను తీయిస్తుంది

ఆమెది ప్రళయ భీకర మహదానందం

అంతా క్షణికం అయినా భయంకరం

భీభత్స రసాస్వాదనతో

ఆమె ఒక వెర్రినవ్వు నవ్వుతుంది

ఆమెది చీకట్లో చిటపటల గోత్రం

హింసిస్తూ నవ్వుతుంది

ఏడిపిస్తూ ఆనందిస్తుంది

ఈ అమావాస్య నాకు

ఒక అపురూప సుందరిలా కనిపిస్తోంది

అంతా చీకటే కానీ

ఏదో తెలీని విశృoఖలత్వం

విశృoఖలత్వంలో

విలయ తాండవం

కళ్ళు తెరిచి చూదామంటే

అంతటా చిమ్మచీకటి

అంధకారం అంతటా

అలుమకొని ఉన్నా

ఒక కనపడని వినపడని

పెను సవ్వడి ఏదో

నిరంతరంగా వినిపిస్తూనే ఉంటుంది

ఒక ఘోరమైన గుండెలదిరే

గజ్జల సవ్వడి

ఒక గుండెల్ని పిండేసే

వికృత రాక్షస విహ్వల దృశ్యం

అయినా ఏ మూలనుంచో

ఒక వికృత సౌందర్య ఝరి

ఒక మరణ మృదంగ ధ్వానంలా

హాయిగా

ప్రాణాలు విడుస్తున్నా నేను

మహదానందంగా

చాలు ఇక ఈ జీవితానికి

ఇంతటి విహ్వలానుభవం

చాలు ..చాలు ..!

– సుమనశ్రీ

Amavasya Sundari,Sumanashree,Telugu Kavithalu