ఆమెదే రేపటి తరం

2022-12-03 11:01:03.0

https://www.teluguglobal.com/h-upload/2022/12/03/429430-reddy-padmavathi.webp

గాయం రక్తాశ్రువులై స్పర్శించినపుడు

చెమ్మగానైనా తడిమిన చెలిమి

కర్తవ్యనిర్వహణలో

కఠినశిల అయినప్పుడు

వధ్య శిలలా జీవితం

విషపుకోరలకు బలైనప్పుడు

కాలయవనికపై బ్రతుకుచిత్రం

కాలిబూడిదయినప్పుడు

అనంతంగా సాగే అపరిష్కృత

సమస్యలకి అలంబనేదీ కానరానపుడు

చేతనత్వాల వేదికేదీ చేతికందనపుడు

ఆత్మబలిదానంలో కూడా

అట్టడుగు స్వరం

ఆణువంతైనా జాలిచూపనపుడు

ఆలిగా, అమ్మగా, అత్తగా,

అడుగడుగునా

అణచివేతకు గురవుతున్నపుడు

ఆడపిల్లను ఆ.. డ..పిల్లగా

సమాజం ఛీత్కరించినపుడు

బలిదానానికి సిద్ధమవక

బ్రతుకు పోరును

బాసటగా తీసుకొని

గొంతెత్తి అడిగే స్వరం

ఆమెదే కావాలి

రంగురంగుల ఆకాశపునేత్రాలతో

రాగబంధాల రక్తిమపులుముకొని

ఆర్ద్ర సంగీత ఝరిలా

ఆమె స్వరం

రేపటి తరానికి

నాందీగీతం అవాలి..

– రెడ్డి పద్మావతి.

(పార్వతీపురం. విజయనగరం జిల్లా)

Reddy Padmavathi,Telugu Kathalu,Telugu Poets,Telugu Kavithalu