ఎందుకు చెప్పడం ?

2022-12-26 16:02:36.0

https://www.teluguglobal.com/h-upload/2022/12/26/432781-kundurthi.webp

నిజంగా నిద్రిస్తున్న వాణ్ణి

ఉత్త పసిపిల్లవాడు లేపొచ్చు

నిద్ర నటిస్తున్న వాండ్ల మీద

ఏనుగులు ఎక్కించి తొక్కించినా

ఏమీ చలనం ఉండదు

తెల్లవారితే సూర్యుణ్ణి

మూసెయ్యడానికి

మేఘాలతో జైళ్లు కడుతున్నారు

శ్మశానంలో దయ్యాలు

శవాలను పాలిస్తున్నాయి

అంతటా ఎక్కడ చూసినా

నటిస్తున్న వాళ్ళు

అధిక సంఖ్యాకు లున్నారు

వాళ్ళు ప్రతినిధులుగా గెలుస్తారు

అక్కడొకడు యిక్కడొకడు మేలుక్కూచుని వుంటాడు

అందరినీ లేపుదామనే ఆశతో

ఎక్కడో ఒక వెలుగురవ్వ కోసం

నడుస్తూ వెళ్ళే నాబోటి వాండ్లకు

కళ్ళల్లోనో కాళ్ళల్లోనో తుమ్మముళ్ళు గుచ్చుకుంటాయి

విననని భీష్మించుకున్న లోకానికి

చెప్పడం ఎందుకో తెలేడం లేదు

చెప్పడం కాస్తో కూస్తో

చేతనవును గనుక

ఊరుకుని చేసేదీ కనపడడం

లేదు గనుక.

– కుందుర్తి

Kundurthi,Telugu Kavithalu