2023-05-19 13:27:17.0
https://www.teluguglobal.com/h-upload/2023/05/19/766813-evariko.webp
ఎవరివో చెలీ!
నీవెవరో చెలీ !
తొలి వేకువ ఘడియలలో
కులుకు వెలుగురేఖవో !
లే — అరుణ మయూఖవో !
నవ వసంత సీమలో
నడయాడే రాగినివో !
నాగస్వరం విని తలూచు
నవ్య దివ్య నాగినివో !
మధ్యందిన తపన బాపు
మర్రినీడ చలువవో !
పిపాసుల తృష్ణ బాపు
పీయూష మరందమువో !
నీలి జలద పంక్తి కురియు
తొలకరి చిరుజల్లువో !
గలగలమని సాగిపోవు
నిర్మల సెలయేటివో !
శక్తి శుద్ధ గర్భ జనిత–
మైన ఆణిముత్యమువో !
ఇంద్రధనువులోన నీవు
సాంద్ర సప్తవర్ణినివో !
శరత్కాల మేఘమాల
లోన చంద్రబింబమువో !
బెదురు హరిణి నేత్ర యుగళ –
మందు కదులు చంచలవో !
హిమ కణముల చిలకరించు
చల్లని హేమంతమువో !
రమణీయాకృతిగ వెలయు
ప్రకృతి సీమంతినివో !
ఎవరివో చెలీ !
నీవెవరివో చెలీ ! !
“రసస్రవంతి”-కావ్యసుధ
(విశ్రాంత, సీనియర్ జర్నలిస్టు, హైదరాబాద్)
Telugu Kavithalu
