తలపుల తరగలు

2022-12-05 07:27:52.0

https://www.teluguglobal.com/h-upload/2022/12/05/429647-thalapula-tharagalu.webp

తలపుల తరగల

తక్కువచూడకు

తనువును పట్టుకు

ఊగిసలాడు

రెక్కలనూపి

తలపుల ఈగలు

ఝుమ్మని రేగి

ఝల్లున కుదిపి

జరిగినవన్నీ జారినవన్నీ

దక్కినవన్నీ దక్కనివన్నీ

ఉన్నవారినీ పోయిన వారిని

ఎవరెవరినొ ఎదురుగ నిలిపి

కుదుళ్ళ పొదళ్ళు

కుదుపుల వెతుకుల

రహస్య పాతర తవ్వులాటలు

వెలికితీసి వెదజల్లింపులు

మోదము కొన్నీ వినోదము కొన్నీ

ఖేదము కొన్నీ గేలులు కొన్నీ

అవమానాలు ఆవేదనలు

ఈసులు ఎన్నో ఇక్కట్లెన్నో!

గుండెల లోతుల గుప్తములెన్నో!

అన్నీ దాగిన అఖాతములెన్నో!

ఇన్ని దాగిన కర్ణుని కవచం

చినిగిపోవును చివరకు చిట్లి

ఇలమీదకు వాలిన

ఈ జిలుగుల చిలుక

తలుపులు తెరచి తలపులతోనూ

ఎగిరిపోవును అపుడో ఎపుడో!

– క్రొవ్విడి వెంకట బలరామమూర్తి

Thalapula Tharagalu,Krovvidi Venkata Balarama Murthy,Telugu Kavithalu,Telugu Kathalu