దీపం పెట్టే వేళ

2023-11-20 13:15:01.0

https://www.teluguglobal.com/h-upload/2023/11/20/859106-dhipam.webp

1

వొంటి మీద

ఆ నాలుగు నీటి చుక్కలూ ఆరిపోకుండానే

నిన్నొక వూహగా పొదువుకొని

వెలిగించుకుంటానీ దీపం.

తుళ్ళి పడదు వొళ్ళు

దీపశిఖ కన్నా నిబ్బరంగా నిటారుగా వెలుగుతుంది

నీలో

నీ బయటా-

2

చీకట్లు అలవాటైన కళ్ళల్లో

నీటి చుక్క కన్నా చిక్కగా

నిలబడి వెలుగుతావ్

నువ్వొక్క దానివీ-

యే నేరమూ చెయ్యలేదని కాదు

యే నెపమూ కాలమ్మీద మోపి తప్పించుకోలేదనీ కాదు.

నీ మోహావేశం అడివిలో తుఫానులా

తుఫానులో గాలిలా

గాలిలో కొట్టుకెళ్ళిన ఎండుకొమ్మలా

అలవాటు కానివి యెన్ని నేర్పావో కదా

దీపం పెట్టినంత శుభ్రంగా తేటగా-

3

అదేదో మరుపేదో వచ్చిందనీ

యేదో వొక మెరుపై వచ్చి వెళ్ళావనీ

క్షణకాలపు వెలుగేదో వెలిగావనీ

యెవరన్నా అన్నా

ఆరిపోతాన్నేను ఖాళీ ప్రమిదలో వొలికిపోయిన నీడలా-

4

నేను చీకటీ

నువ్వు దీపమూ –

యిక

అంతే యెప్పటికీ!

– ఆఫ్సర్

Deepam Pette Vela,Telugu Kavithalu