2023-02-04 10:49:53.0
https://www.teluguglobal.com/h-upload/2023/02/04/721991-thrinetrudive.webp
వైవిధ్యభరిత ప్రపంచంలో…
సమన్వయింప బడ్డ…
ప్రకృతి ఇది…. !
కనిపించే దానికి… మనకర్ధమయేడొకటి !
దాని పరమార్ధం వేరొకటి !!
నీచర్మచక్షువులుచూపించేదాన్ని
నీబుద్ధి విశ్లేషించలేదు… !
భ్రమ – ప్రమాదాలకు…
దారితీయిస్తుంది… !!
ఈ సంకటంనుండి…
నువ్ గట్టెక్కాలంటే…,
నీకు ఉపనయనం కావాల్సిందే
దానికోసం…
వ్యయ – ప్రయాసల… బాహ్య కార్యకలాపాల పనిలేదు… !
అది… నీఫాల భాగంలో…
పరివేష్టింపబడే ఉంది.. !!
నీ శోధన – సాధన అంతా….
బాహ్యంగా కాదు…,
అంతర్ముఖంగా జరగాల్సిందే!
ఉపయోగించు….. !
నీమూడోకన్నును….
ఉపయోగించు…!!
అది…నీఆత్మప్రకాశ
జ్ఞానజ్యోతి
ఎంత నిగూఢ రహస్యాలైనా…
తేట తెల్లమైపోతాయి… !
సత్యా సత్యాలను…
సుస్పష్టం చేసేస్తుందది.. !!
నీవూ… త్రినేత్రుడవే…. !
ఆ పరమశివుని వారసునివే!!
ఇది తెలుసుకుంటే…
నీబ్రతుకు శివము,సుందరము
లేకుంటే.. నిర్జీవ సదృశం !
జీవచ్ఛవమే…. !!
– కోరాడ నరసింహా రావు
Korada Narasimha Rao,Telugu Kavithalu
