ప్రవాసి

2023-01-12 16:38:41.0

https://www.teluguglobal.com/h-upload/2023/01/12/435069-pravasi.webp

ఒడ్డు తెగి చాలాకాలమైంది

ఒడ్డు మారి కూడా

దశాబ్దాలు దాటింది

అయినా అమ్మ నేలమీద ప్రేమ

అణువంతయినా తగ్గదు

ఆదరించిన నేల

అన్నీ ఇచ్చింది

బ్రతుకు ఫలాలను అందుకోవడానికి

పెరిగెత్తడం నేర్పింది

కానీ తప్పటడుగులు వేసిన నేలే

ఎప్పటికీ తలపుల్లో నిలుస్తుంది

ఈ నేలే కాదు

ఇక్కడి ఆకాశం కూడా

అపరిచితంగా తోస్తుంది

ఉదయించే సూర్యచంద్రులు

వాడిన వస్తువుల్లా కనిపిస్తారు

ఎక్కడెక్కడికో వెడతాము

రెక్కలొచ్చిన కలలా ఎగురుతాము

కానీ కనులుమూసుకున్నప్పుడు

చిన్నప్పటి నేస్తం ముఖమే

కలలో పలకరిస్తుంది

ఏదో ఒకనాటికి

నేనూ ఈ నేలక్రిందే నిదురిస్తాను

అనంతశయనంలో కూడా

బహుశా

అక్కడి మట్టి వాసనలే

విడవకుండా నన్ను వెంటాడుతాయి

– విన్నకోట రవిశంకర్ (అమెరికా)

Vinnakota Ravi Shankar,Telugu Kavithalu