లోతుల్లోకి…

2022-12-04 14:59:56.0

https://www.teluguglobal.com/h-upload/2022/12/04/429567-hrk.webp

నిన్ను పట్టుకుని ఇంకా ఇంకా

లోతుల్లోకి వెళ్దామనుకుంటాను

బాగా చిన్ని మనస్సుతో చూసిన

నీ యవ్వనం నుంచి

మొదలవుతాను

తెల్లని ధోవతి చెంగులు

నా బక్క వేళ్ళ మధ్యన

ఎండిన కంపతార మీద ఎగురుతున్న పల్చని ఆకులు

ఇంటికి వచ్చిన మీ నాన్న

పట్నంలో పత్తి అమ్మి తెచ్చిన రాణిరూపాయల్లా

నీ నిడుపాటి కళ్లు రెండే

కొన్ని వేలైనట్లు ఒక భ్రమ

బండి అలా పోతూ పోతూ ఉంటుంది

వందల ఏండ్ల ఇసుకను రాసుకుంటూ బండి గాన్లు

ఎద్దులను నువ్వు అదిలించవు

వాటికి తెలుసు

చేని నుంచి రాబోయే

పచ్చని చొప్ప రుచి

చొప్ప నములుతున్నప్పుడు

ఇంకా పూర్తిగా ఎండని

జొన్న ఒగుళ్ళ తీపి పాట కూడా

వాటికి తెలుసు

అందుకే గిట్టల చప్పుడులో

లయ తప్పని

సంగీతం, దాని ట్రాక్ లో

మెడగంటల గీతం

మీ నాన్నదో వాళ్ళ నాన్నదో

పడ్సాల సుంచు మీది

చీకట్లో ఒక సిరాబుడ్డి,

పక్కన పదునైన చురకత్తిలా

ఒక కలంపుల్ల, తెలియక పారేసిన తాటాకు పుస్తకం

ఆ మూలన ఎందుకు ఉండిందో తెలుసుకోవాలని

ఇంకా ఇంకా

చీకటి లోతుల్లోకి వెళ్ళాలని

బడికి నడిచే దారిలో,

ఇంకా మిగిలున్న అడివిలో

అప్పుడే కురిసిన వానను మోసుకెళ్తున్న వరద వాగులో

ఇంకా ఇంకా

లోతుల్లోకి వెళ్ళాలని ఉంది

సుంచు మీద

సిరాబుడ్డి కలంపుల్ల లేవు

తాటాకులు అంతకు ముందే లేవు, అవి మావి కావని అనుకున్నాం,

మావి కావేమో

ఇక ఎప్పటికీ

నేను లోతుల్లోకి వెళ్లలేనేమో…

(సుంచు=అటక. జొన్న ఒగుళ్లు= జొన్న కర్రల మీది పొడవాటి ఆకులు. )

 – హెచ్ ఆర్కే

Telugu Kathalu,Telugu Kavithalu,Telugu Poets,HRK