వలపు తలపు (కవిత)

2023-02-16 10:04:43.0

https://www.teluguglobal.com/h-upload/2023/02/16/723413-valapu.webp

ఎదతలుపులు నీ కొరకై

తెరవాలని ఉంది

మనసును ఆకాశంలా

పరవాలని ఉంది

నీ ఊహల ఊయలలో

ఊగి ఊగి అలసినాను

దిగులంతా మేఘంలా

కురవాలని ఉంది

అడుగులడుగుతున్నవి నీ

జాడకొరకు ప్రతి దారిని

గుండె చీల్చి ఆనవాలు

చూపాలని ఉంది

వలపు పరీక్షలకు లేవు

పాఠ్యపుస్తకాలేవీ

నీ చూపులు పాఠాలుగ

చదవాలని ఉంది

వలపు గెలుపు ఆట ఎంత

జటిలమొ కద మోహనా

ప్రాణమొడ్డి నీ మనసును

గెలవాలని ఉంది

– తుమ్మూరి రామమోహనరావు

Telugu Kavithalu,Tummuri Ramamohana Rao