సంతకం (కవిత)

2023-09-29 05:57:12.0

https://www.teluguglobal.com/h-upload/2023/09/29/832443-santhakam.webp

ఏదో ఒక రోజు

నిన్నటి మరకలన్నీ కడుక్కుని

పరిశుభ్రంగా నిద్రలేవాలి

భుజంపై

దూదిపింజంత బరువుల్లేనట్టు

గాలితో అతితేలికగా అడుగులేయాలి

పూల పరిమళమై వ్యాపించాలి

ముళ్ళను క్షమించి

గాయాలను కడిగేసుకోవాలి

ఆకాశమంత

ఆనందాన్ని ఆహ్వానించి

ప్రకృతిలోని హరితాన్నంతా

హృదయంలోకి ఒంపుకోవాలి

రెక్కలన్నిటినీ విప్పి

పక్షంత స్వేచ్ఛగా

మనసును ఎగరేయాలి

సీతాకోకల సౌకుమార్యాన్ని

తడిమి చూసి

సృష్టిలోని సౌందర్యాన్ని

తనివితీరా తాగాలి

ఆత్మీయుల దరి చేరి

కబురుల కోటలు కట్టాలి

వాయిదా వేస్తున్న పనులన్నీ

పూర్తి చెయ్యాలి

సంతకం పూర్తి చేసాక

నిదుర పొత్తిళ్ళలో

ఒదిగిపోవాలి

సంపూర్ణ జీవితమై

వెలిగిపోవాలి

-పద్మావతి రాంభక్త

(విశాఖ)

Padmavati Rambhakta,Telugu Kavithalu,Santhakam