గజల్…నా లోని నువ్వు (కవిత)

2023-05-14 08:53:31.0

https://www.teluguglobal.com/h-upload/2023/05/14/763378-nalo-nuvu.webp

చూపు వెలిగిపోతున్నది నిను చూసిన నయనంలో

ప్రేమ పెరిగిపోతున్నది నిను వలచిన హృదయంలో

నీ బుగ్గల సిగ్గున్నది అరుణోదయ సమయంలో

నీ నీడల మెరుపున్నది చందమామ కిరణంలో

వేల ముళ్ళు దిగుతున్నా పూలస్పర్శలా ఉన్నది

పూలకారు తోడున్నది నిను చేరిన పయనంలో

నిను చూడని రాత్రులలో గడియ గడపలేకున్నా

నన్ను తోసి వెళ్ళిపోకు వేధించే విరహంలో

మేడలొద్దు మిద్దెలొద్దు నీవు నేను ఉండేందుకు

గూడు కట్టుకుందామే సిరివెన్నెల వలయంలో

విరజాజులు మల్లెపూలు స్వాగతాలు చెబుతున్నవి

వెన్నెల విరిసిన రాతిరి మునుగుదాము సరసంలో

చీకటన్నదే లేదని చెప్పగలను “నెలరాజా”

జాబిలిలా వెలుగుతావు నా మానసగగనంలో. 

– ఆర్ వీ ఎస్ ఎస్ శ్రీనివాస్

Telugu Kavithalu,RV SS Srinivas