పడు మొక్కలు (కవిత)

2023-03-03 09:28:00.0

https://www.teluguglobal.com/h-upload/2023/03/03/725481-plant.webp

జడి వానలకే తడి నేలల్లో

పాముల వల్లో పక్షుల వల్లో

పాపం పడు మొక్కలు

వాటికవే మొలిచేస్తాయి

వాటికెవరూ నీరు పొయ్యరు

వాటికెపుడూ ఎరువెయ్యరు

బాటకెదురొస్తే పీకి పారేస్తారు

మాటకెదిరిస్తే అణిచేస్తారు

అయినా ఏ పక్కనో మిగిలినవి

పునాదే లేని అనాధ జీవనాల్లా

వరమో శాపమో తేల్చుకో లేని

కుంతి మొక్కుల ఫలితాల్లా

వాటికవే పుట్టి పెరిగేస్తాయి

కానీ స్వయంకృషితో ఎదిగి

పంట కొచ్చాక పళ్లు కాస్తుంటే

ప్రతి వారు పరుగెత్తుకొస్తారు

హక్కులకై దత్తత తీసుకుంటారు అచ్చం

ఓ అనాధ అందలమెక్కితే

అందరికి బంధువైపోయినట్టు.

– దుద్దుంపూడి అనసూయ

Duddumpudi Anasuya,Telugu Kavithalu